真相 vs X-files

朝晨早六點起身, 去o左灣仔金紫荊廣場睇升旗儀式.

奧運金牌運動員o既風采, 都好近距離睇到

林丹: 真人好似相中o既周杰倫, cool cool 地 , 難得係神情好似. (我未見過jay真人, 唔能夠判斷佢地兩個真人似唔似樣, 因為好多明星, 上鏡同睇真人, 完全可以係兩個樣.)

郭晶晶: 真人ok啦, 好靚….稱唔上喎…各花入各眼啦.

一眾體操選手: 薯仔自問無偏見, 純粹睇佢地外表, 覺得佢地幾個細細粒, 人又瘦, 一唔覺眼, 真係以為係小朋友. 真相係點…..將會係一個X-file.

X-files 無線明珠台又重播Season 1..對真相鍥而不捨的莫探員, 雖然係個虛構角色, 但好值得做新聞的人學習.

完事後, 去了檀島食番個早餐, 無食egg tart, 但就叫o左個奄列早餐. 貨真價實地吃個飽飽.

悠閒下午茶？

最近都係只能以一個忙字去形容呢排的生活, 要到九月中先有時間好好打理呢個blog.

今日下午因為唔得閒食晏, 直到三點幾”口係”美心快餐食下午茶, 一睇個餐牌, 嚇親, 一個燒鴨粉要成21元, 同前排16-17元, 貴”口左”一截. 我叫”口左”比較抵食的下午茶便當 , 18大元有炒麵, 薯條, 雞翼, 沙律, 甜品連埋熱飲, 樣樣分量唔多, 但以呢個價錢, 有埋甜品食, 都算唔錯, 值得推介.

上星期奧運閉幕禮前一日, 問一個做電視製作的朋友, 有無時間gathering, 順便問佢奧運做成點, 佢第一句話係”執番條命”, 做奧運連踩廿日, 好支力, 但要等到九月頭先得閒.

悠閒下午茶, 快餐店好多時都用呢個phrase做promo…呢個形容詞唔完全適用於傳媒人.

就算記者四圍去,搵快餐店做落腳地方, 都係standby 中, call人, 搵張檯寫或打稿, 好難relax.做採訪或製作的, 多數唔駛好固定時間番工, 又或者坐定定係位, 就情願調節下食飯時間, 唔駛lunch time 同人迫, 慳番多D時間做o野,唔係蛇壬出來hea食下午餐.

所以我決定邀請我那位好友, 搵日有時間去酒店食個ok quality的下午茶. 畢竟, 辛苦搵來志在食. 就算只有傳媒人微薄的人工, afternoon tea 都afford到o既.

上個月某個星期三, 薯仔忙裡偷閒, 咁o岩o係尖沙咀行o左陣, 諗住慰勞一下自己, 去半島食個下午茶high tea, 點知入到去發現, 已經有條排o左至少7-8人的隊等緊.薯仔二話不說, 即時掉頭去也.

貧富懸殊的香港, 無論係有錢人定窮人, 最難得的就係得閒, 係呢個浮躁o既都市, 想食一餐悠閒下午茶…好難.

啤酒, 紅酒, 借酒銷愁

八月十二號, 有人送免費門票俾薯仔睇奧運馬術比賽. 當日係歷史上第一次喺香港頒發奧運獎牌嘅日子, 都算係一個memorable day.  薯仔好急先收到通知, 飯都未食就趕過去, 所以幫襯咗場地嘅小賣部. 價錢幾合理, 有d 嘢價錢仲平過7-11, 例如Bonqua 水, 一枝先至5元. 薯仔買咗支西柚味Bonqua, 加埋一隻雞脾, 盛惠18大元, 幾化算.

小賣部有兩款啤酒賣, 青島同Budweisser, 但薯仔唔好啤酒, 無買到. 最搞嘢係因為”伊利”奶係event sponsor, 小賣部都有得賣, 5元包, 天時暑熱, 有咩人會喺口乾到極嘅時候買奶飲呢? 感覺上係類似product placement嘅宣傳, 多過靠賣包奶出去搵錢.

20082年8月12日奧運馬術三項賽頒獎典禮

當晚,天色幾好, 仲有月色照人, 一陣涼浸浸嘅微風從城門河吹來, 幾寫意架.

薯仔因為有識睇馬術嘅朋友係側邊講解, 都follow到成個賽事, 睇睇下都覺得幾有趣.

後來德國選手拎咗團體同個人三項賽金牌,  有一班德國觀眾, 呷住德國最出名嘅冰凍嘅啤酒, fing 下國旗, 唱吓國歌, 開開心心咁enjoy 個party..

薯仔睇見佢地咁開心, 幾乎忘記咗自己身處香港, 加上無工作喺身,  成個人都輕鬆晒.

今晚(Aug 15凌晨)喺番屋企途中用手機睇SCMP, 提到由8月14日開始, 同美食博覽同日開始嘅紅酒展, 報導中嘅外國專家, 話紅酒展唔適合喺八月搞, 因為D參展商都放晒暑假..

飲啤酒, 俾人感覺可能好”佬”, 但能夠同成班老友隊啤牛飲,  暢快過好拘緊咁飲支貴紅酒多多聲啦..

本來, 最近睇完馬術心情都幾好, 可惜無耐就爆出一連串關於奧運開幕禮表演做假同運動員懷疑虛報歲數嘅新聞, 作為中國人, 對住呢d醜聞, 除咗自隊幾杯, 借酒令自己wing wing地無咁清醒, 無咁難過之外, 仲可以點?

中國人幾時先至可以好似德國人咁, 為咗國家實至名歸嘅光榮舉杯暢飲, 而唔係為咗國家政府嘅弄虛作假而借酒銷愁呢?

奧運滿漢全席

呢幾日, 薯仔都好忙, 開始早晚顛倒的生活.食宵夜, 好易肥, 但無辦法.

因為私人原因, 開幕式我都未睇. 有外國報章以滿漢全席來形容開幕式 , 唔知呢D 叫做讚美定係明讚暗踩呢?

係薯仔的印象入面, 滿漢全席的製作過程幾殘忍, 聽聞有一道猴子腦, 係把一隻猴子的尾巴夾住在檯中間, 之後就一野扑濕隻馬騮的頭, 趁佢就死未死個陣, 個腦仲係郁郁地function緊, 就拿湯匙“畢”來食, 好得人驚. 把文明同野蠻共冶一爐, 這就是今天的中國. 一面可以係世人面前, 展現奧運各場館的浩大, 但另一邊廂又可以叉香港記者頸, 打日本記者肚..

查維基百科, 睇下滿漢全席實際有咩食.. 一睇..唔多對薯仔口味, 有成過百道菜, 排場大但欠精緻, 同有d評論講, 奧運開幕禮, 只有視覺刺激但欠內蘊精神一樣.

維基百科講,

滿漢全席是中國一種集合滿族和漢族飲食特色的巨型筵席，起源於清朝的宮廷，原為康熙66歲大壽的宴席，旨在化解滿漢不和，後世沿襲此一傳統，加入珍饈，極為奢華。

奧運原是一個旨在促進各民族友誼的運動, 滿漢全席也有民族大融和之意, 但中國今年搞奧運, 卻是一片戾氣, 新疆有恐怖襲擊, 香港又要抬觀眾出場, 呢d就叫做和諧咩?

清朝的康熙帝, 被認為是仁慈的獨裁者, 甚至一代聖君, 在他的統治時期, 還是會大興文字獄; 現代的中國統治者, 是進步咗定係退步? 為咗鞏固政權, 封住人民嘅咀,今日嘅中國同封建時代嘅中國, 有咩分別?  奧運展現嘅中國, 係文明嘅中國定係野蠻嘅中國?

滿漢全席係少數民族統治者度出來嘅菜式, 大自然嘅恩賜加人類智慧整出來嘅食物變成咗PR工具. 猴子腦可能好好味 ..只要你肯狠下心腸, 唔去理解背後殘酷嘅故事,食完之後滿口血紅, 都依然可以自我感覺良好…

延伸閱讀:

新華社: 外媒讚嘆北京奧運開幕式:中華藝術的”滿漢全席”

特首的母乳和飲用水

飲香港水大嘅特首, 早前喺出席一個論壇嘅鬧出嘅笑話, 幾值得做一道政治新聞甜品, 不過, 我就唔多覺有傳媒報導, 唯有係度同大家分享吓.

話說當日曾特首係台上用ok嘅普通話, 抑揚頓挫, 七情上面咁講香港同祖國點關係密切, 祝願祖國舉辦奧運成功之類, 投入地演繹個種你完全估到佢之後講咩嘅講詞. 致辭完畢之後, 佢以為要番落台下坐低, 但其實 rundown安排係佢要喺台上同主辦單位做 頒贈紀念品儀式, 於是台上司儀用普通話講” 曾特首, 請留步” , 但點知佢就無反應, 依然故我係咁向台下走, 直到有人拎咗個咪用廣東話講番同一句話, 佢先至識得停住.  當時全場首先靜咗一靜, 之後就全場哄笑, 個陣台下仲坐住中聯辦嘅高主任, 富豪第二三代同埋重量級嘅政商界人士, 瘀到咁, 我都替佢難受, 雖然我都係有份笑佢嘅一份子 .

Donald 就算係爵士也好, 特首也好, 只要飲水思源, 記住廣東話係你嘅母語,  香港人先至係你嘅老板, 咁你至會得到香港市民嘅尊敬, 民望先唔會繼續插水, 更加唔會被香港人恥笑.

Wikiquote亦有網友整理咗一d 曾生嘅金句, 有幾句同食物有關. 頭兩句, 幾骨痺, 第三句, 講童年生活, 我同情佢.

http://zh.wikiquote.org/wiki/%E6%9B%BE%E8%94%AD%E6%AC%8A

「飲香港水，流香港血」

「我想念香港的那個雲吞麵，如果現下讓我用一百美金去買一碗麵我都會買。」

「我記得小時候無知，買錯了隔夜麵包，又給爸爸打一頓。有次他吩咐我買豆腐，我不懂得，買了回來發現是餿的，又要挨打。」

Wikiquote亦有無線電視劇 溏心風暴嘅金句選錄, 部劇收視嘅成功, 有賴於對白好多quotable 的”金句”, 唔生活化, 但夠爆, 足以成為炒作嘅話題.

溏心風暴2之家好月圓, 今輯以月餅做題材, 播咗一個星期, 平均收視係點, 薯仔認為幾反映到香港人嘅民智係咩程度, 甚至乎香港人是否適合普選特首, 會密切留意.