「為誰而戰？為何而戰？」: TVB 520裁員, 六四事件與香港電視行業的未來

假如TVB管理層深信裁員的決定正確, 點解唔敢認, 要自製新詞, 咩”人力資源分配計劃” …唔通TVB管理層以為唔提裁員兩隻字 , 人地就唔知TVB裁員咩?

咁同掩身盜鈴有咩分別? 咁同六四袁木睜大眼講天安門清場過程中”沒有死一個人，沒有軋傷一個人。” 有咩分別? 以為咁就可以愚弄天下人? 你自己低能唔緊要, 但唔該你唔好當全港觀眾都係傻仔先得架.

今年經濟市道好差, 廣告收入大幅下滑, 傳媒機構正值嚴冬, 理性地及有客觀準則地裁員, 無可厚非. 管理層的責任: 一. 要向股東交待盈利達一定水平 (幫老板搵錢係責任, 否則自己職位都可能不保). 二. 保持公司的長遠競爭力, 削減開支係其中一個方法, 裁員當然唔一定係最佳方法, 但別無他法時施行也算對得住同事.

今次事件最令人心寒之處是: 這一連串反智及涼薄的說話, 是由有多年電視台或廣播工作經驗的管理層說出來, 由一間據說做事很有規章制度, 有超過四十年歷史的、大股東長期持有股份的公司的管理層說出來….這意味著這次亂up不是出於無知, 而是有經過考慮的.

作為一個管理層行政人員, 置個人誠信不顧, 朝三暮四, 企圖妖言惑眾, 不單令自己形象受損, 更令公眾對機構的裁員行動更為反感. 如此反智的屎橋都可以出街, 簡直係屁股指揮腦袋. 如此惡劣的情況, 出現在制度十分穩固, 近乎沒有缺口打破的系統, 可以斷定問題已經病入膏盲…達腦桿死亡程度…無可救藥的境地.

我對”電視” 這個media platform的消失並不失落, 這傳統媒體比較單向, 互動性不及互聯網, 被互聯取代也沒有什麼可惜的. 但由一班如此質素及髮線已向後移的阿伯帶領TVB轉型發展新媒體業務, 唔好再自欺欺人啦.

假如公司提供合理工作量的工作環境, 員工假以時日, 理應能夠掌握好在電視台製作moving image 及event planning 的經驗, 把自己稍稍調整一下, 按理過渡至創意工業內的其他行業發展, 應該沒有問題. 可悲的現實是, 在電視台的基層人員, 例如PA、導演和記者, 可以連績多日朝7晚26, OT到捱病, 恍如一部機器般行屍走肉的做事, 如是這做十年八年, 有能力也未必有晉升機會.

曾經有跟湖南衛視合作過的幕前和幕後, 都不約而同告訴我, “人家湖南衛視的工作人員好pro 呀, 人地成班都係二十幾後生仔, 都可以負責一個大show, 處理得鉅細無遺,” “湖南衛視d 人好醒目 , 好叻, 掂”, “湖南係一個好窮嘅地方, 點解香港咁有錢反而做唔到呢?”

亦曾經有一個中國中央電視台極高級的管理層人員閒聊時告訴我, “我們現在招人都是大學生, 培訓他們擁有全面的技能, 也會調換崗位 (p.s.落實係點我唔知啦)

TVB近年節目的創意、技術質素、新聞操守、管理質素都同時出現倒退跡象, 八十集的台慶劇”珠光寶氣” 、去年512四川地震、2008奧運質素之差都係鐵證, 在內裡的員工, 又能夠拎到幾多有用的經驗及具競爭力的知識做本錢出外闖呢?

我不是TVB的員工, 面對TVB去出有成十億利潤, 依然裁員110人, 管理層仲要夠膽做唔夠膽認, 不知廉恥地妖言惑眾, 香港專業管理人引以為傲的的誠信去咗邊度? 香港傳媒俾呢d 管理層亂搞, 又點會唔俾其他地方的傳媒超越? 香港電視人是「為誰而戰？為何而戰？」

我冷靜, 但更失望…甚至認為絕望, 問題在於, 一班無承擔的管理層和一班毫無企業良心的股東, 在操控香港具壓倒性影響力的電子傳媒. 這是香港電視行業的悲劇, 也是香港社會現時種種醜陋的縮影, 也預言著香港將被淘汰的危機. .

我終於明白友人對香港現況的批示: 除了革命, 別無他途 .