呀!運

今日去咗廣州做嘢, 啱啱番到屋企 . 腰酸背痛. 我次次去完購書中心, 都要抬十本八本書番來, 今次亦唔例外.

晨早六點就要起身搭直通車, @_@..還幸, 食在廣州, 每次上廣州食嘅商務午餐, 都無咩邊次唔係食得好嘅,算係補償番啦.

喺廣州試吓上香港電台同蘋果日報網站, 都上到喎.. 大概因為殘奧依然舉行緊, 至於幾時會睇唔到呢? 真係要有心人日日check吓. 兩年後嘅廣州, 仲可唔可以無阻礙睇到港台同蘋果嘅網頁, 薯仔希望不用by luck.

殘奧…香港傳媒都係一味識講金牌選手, 但對殘疾人士嘅權利 – 特別係運動嘅權利 , 有無過深刻嘅討論呢?我唔覺, 如果有請話我知, 唔該. 我以前同一個殘奧選手傾過偈, 雖然係幾年前, 詳情恕我唔喺度講o剌, 但喺我依然記得清楚.運動員嘅堅持, 同佢地家人嘅努力, 我深信殘奧值得支持.

近排大家都將眼光集中喺大陸, 其實喺台北2009年都會舉辦”聽障奧林匹克運動會”, 大家又知唔知呢?

喺廣州車程沿途向車外望, 見到開始宣傳2010亞運, 奧運才剛落幕, 亞運又上場, 真係夠忙..亞運開幕式, 大家不如估下有咩表演, 嘗試度個rundown出來, 到時睇吓自己估中幾多.

我估一定有:

汪阿姐的表演/ 做MC

八和會館連同廣東的名伶

劉德華, 成龍 唱歌

一大班香港歌星唱歌

導演咩人適合做呢? 諗諗先..

最近搭巴士睇咗一套叫”噢!運小將”嘅卡通(唔sure個名, 因為好憎唔想記住)呢d咁取巧嘅名, 真係令薯仔滴汗. 好驚佢到時亞運, 又出部”呀!運xx”… X_X

從 2008北京奧運, 2009香港東亞運, 2009台北聽障運動會,2010廣州亞運, 將兩岸三地嘅人文質素, 藝術修養, 籌辦大型活動能力比較一下, 應該會幾有趣, 希望幾個城市都”好運”.

延伸閱讀:

台北2009年聽障奧林匹克運動會官方網站

http://www.2009deaflympics.org/tw/index.php

廣州2010亞運會官方網站

http://www.gz2010ag.org/

“大擦特擦”的記者會

最近去咗一個喺酒店舉行嘅記者會, 有醒目同事發現一位阿叔, 西裝畢挺, 舉止斯文 , 但胸前既無掛名牌, 又無同人傾過計. 記者會開始咗, 台上嘉賓係咁講嘢, 佢把口亦無停過係咁食. 食完, 就”鬆”人.

醒目嘅同事懷疑個位阿叔係白撞的, 佢當然無採取任何行動. 只係講出來, 等大家多一個話題而己.

薯仔認為會場入面各款精美小食同飲品都係已出之物, 俾嘉賓任飲任食, 只要佢食得斯斯文文 , 唔好”搞寸/搞cheap 人地個party”, 就算佢呃飯食, 就由佢吧. 佢肯來對主辦機構甚至乎社會可能係好事添!對主辦機構嚟講, 固然可以多個人充撐場面 ; 而對整個社會嚟講, 唔單止可以減少浪費食物, 同埋可以減少”路有凍死骨, 朱門酒肉臭” , 香港社會貧富懸殊嘅情況.
薯仔曾經收到一封email話, 最先註冊去個press con頭幾多位嘅記者, 就可以獲贈價值唔少嘅電子用品配件. 記者如果採訪, 食咗主人家茶禮, 大家仲點可以期望佢地嘅報導無加鹽加醋呢?透過記者會”大擦特擦”的, 除了那類可能無錢開飯的阿叔, 仲有得好少錢開飯嘅香港記者. 邊類騙子危險d呢?

聽講大陸記者去一次記者會, 位位拿個公價三百大元的紅包, 呢d數搵埋仲多過人工.

香港有些記者同傳媒機構, 當被人拎來與大陸同行比較時, 成日話堅持無償採訪, 講到自己頭頂好似有光環咁, 有時薯仔真係覺得…你地只係包裝好些少啫, 你地咪照寫鱔稿, 將採訪淪為買賣. 大陸同行比較均真, 三舊水就三舊水, 而你就想被訪者以後俾獨家料你, 又或者為咗做到名人專訪吸引讀者/ 俾老細賞識 / 或者提高自己知名度, 不惜餵讀者睇鱔稿. 仲差過人地明碼實價. 大陸傳媒能夠form到一個買賣市場, 減低交易費用, 對資本主義嘅實踐, 比諸香港傳媒走得更前, somehow.. 亦更加有香港特色, 同日益向北看嘅香港傳媒人, “相映成趣”.