“奶”嘢的香港同大陸消費者

蒙牛..好彩我無買佢地的股票, 前排, 我都睇好呢隻股, 唔知好彩定唔好彩, 薯仔窮, 無多餘錢買番一兩手, 亦都係咁保住無蝕錢.

香港傳媒關於事件的報導, 對消費者嘅權益講得唔夠, 除咗講點樣去超級市場退番幾元雪條錢之外, 我最想知如果香港人食咗毒奶粉有事, 要索償嘅法律程序同成本有幾高, 有咩辦法定係無辦法..

你話我咩都上綱上線都好, 我覺得國內咁多”毒品”的無良商人出現, 係十年文革摧殘人性嘅後遺症, 人人為咗自己, 傳統嘅禮義廉恥全都無晒, 咩黑心壞事都做得出. 前排廣東揭陽市殺人取屍亦都另一單睇完令薯仔好唔安樂嘅新聞, 因為人變咗野獸, 人食人,人不如芻狗…

香港傳媒鬧黑心商人, 當然鬧得好熱鬧, 不過睇番今年消費者委員會舉辦嘅”消費權益新聞報導獎” 得獎名單, 新聞組別攞到金牌嘅報導, 就係踢爆香港傳媒不擇手段搵錢嘅報導.

“有線涉謊言教材派員工”係明報嘅記者做臥底, 揭發有線電視嘅銷售部門, 有系統咁教sales講大話, 昆住戶電視同寛頻有問題, 趁機促銷有電視服務.

有線新聞嘅製作, 質素算係穩定地ok, 可惜因為有d 咁嘅管理層容許這些不法嘅皁劣手法促銷, 睇短線唔睇長線, 搞壞公司嘅brand, 令員工面目無光.

明報夠膽踢爆有合作搞開event嘅有線, 算係done a good job 啦. 政治新聞失節嘅明報, 都只好學大陸傳媒, 靠做好民生嘅題材爭取讀者吧!

延伸閱讀:

消費權益新聞報道獎 2008- 得獎名單

網上論壇轉載明報報導資料

奧運滿漢全席

呢幾日, 薯仔都好忙, 開始早晚顛倒的生活.食宵夜, 好易肥, 但無辦法.

因為私人原因, 開幕式我都未睇. 有外國報章以滿漢全席來形容開幕式 , 唔知呢D 叫做讚美定係明讚暗踩呢?

係薯仔的印象入面, 滿漢全席的製作過程幾殘忍, 聽聞有一道猴子腦, 係把一隻猴子的尾巴夾住在檯中間, 之後就一野扑濕隻馬騮的頭, 趁佢就死未死個陣, 個腦仲係郁郁地function緊, 就拿湯匙“畢”來食, 好得人驚. 把文明同野蠻共冶一爐, 這就是今天的中國. 一面可以係世人面前, 展現奧運各場館的浩大, 但另一邊廂又可以叉香港記者頸, 打日本記者肚..

查維基百科, 睇下滿漢全席實際有咩食.. 一睇..唔多對薯仔口味, 有成過百道菜, 排場大但欠精緻, 同有d評論講, 奧運開幕禮, 只有視覺刺激但欠內蘊精神一樣.

維基百科講,

滿漢全席是中國一種集合滿族和漢族飲食特色的巨型筵席，起源於清朝的宮廷，原為康熙66歲大壽的宴席，旨在化解滿漢不和，後世沿襲此一傳統，加入珍饈，極為奢華。

奧運原是一個旨在促進各民族友誼的運動, 滿漢全席也有民族大融和之意, 但中國今年搞奧運, 卻是一片戾氣, 新疆有恐怖襲擊, 香港又要抬觀眾出場, 呢d就叫做和諧咩?

清朝的康熙帝, 被認為是仁慈的獨裁者, 甚至一代聖君, 在他的統治時期, 還是會大興文字獄; 現代的中國統治者, 是進步咗定係退步? 為咗鞏固政權, 封住人民嘅咀,今日嘅中國同封建時代嘅中國, 有咩分別?  奧運展現嘅中國, 係文明嘅中國定係野蠻嘅中國?

滿漢全席係少數民族統治者度出來嘅菜式, 大自然嘅恩賜加人類智慧整出來嘅食物變成咗PR工具. 猴子腦可能好好味 ..只要你肯狠下心腸, 唔去理解背後殘酷嘅故事,食完之後滿口血紅, 都依然可以自我感覺良好…

延伸閱讀:

新華社: 外媒讚嘆北京奧運開幕式:中華藝術的”滿漢全席”

唔好貪甜頭

政治氣候陰晴不定, 也像香港一些傳媒的思路, 飄忽之處教人摸唔透.

大公報:  副主席帶來陽光 2008-7-7

俗語說：「貴人出門招風雨」，香港昨日的天氣正正應驗了這一句話。早上九點左右，中外數十名記者抵達現場沒多久，天空開始下起微雨。不過現場所有人都無視於 天氣的影響，各項準備工作仍緊鑼密鼓地進行。警戒人員將過關的人流作最後的疏散安排；保安人員則四處進行再一輪的安全檢查；還有工作人員鋪設迎接習近平副 主席的紅地毯，將紅地毯用膠布黏在地上，並用膠布細緻將地毯上面的塵埃一絲不苟地清理。

十點左 右，特區行政長官曾蔭權、政務司司長唐英年、財政司司長曾俊華及律政司司長黃仁龍陸續抵達現場，準備迎接副主席的到來。此時，雨勢突然轉大，並且伴隨一些 風勢，令到沒有什麼遮掩的記者區短時間內出現一些混亂。雖然記者都是有備而來，但手持各樣的相機、器械、話筒，很多記者仍然要面對淋雨的困境。不過，香港 記者專業的精神委實令人佩服，即使面對如此尷尬的情況，沒有任何人離開避雨。而特區的政府官員更是「屹立風雨中」，特首以及三位司長在工作人員陪同下撐起 雨傘，仍舊站立在紅地毯旁靜候副主席的到來。

不過天公眷顧，雨勢在習近平抵達之前慢慢減弱，之 後更是雨後放晴，天空重現藍天白雲。習近平在十點十五分左右抵達口岸。他身著名西裝、佩戴一條藍色斜紋領帶，面帶微笑地與曾蔭權及其他司長逐一問好。之後 微笑著走向事前準備好的「咪台」前發表講話。在講話一開始，習近平首先向傳媒表達了問候，一句「記者朋友大家好，剛剛下了雨，大家辛苦了」，頓時令到現場 剛剛緊張的氣氛得到不少緩和。講話期間他一直面帶微笑，說到重點時，不時舉起手來做一些強調的手勢，神態自若。能夠近距離目睹領導人不凡的風采，實在是難 能可貴的經驗。

報道的標題是: “副主席帶來陽光“

但報道卻如此開頭: “俗語說：「貴人出門招風雨」，香港昨日的天氣正正應驗了這一句話。

究竟習副主席帶來o既係陽光定係風雨? 定係兩者都帶到香港呢?

按報道所述的事態發展 , 係天下大雨後放晴.

一篇報導的標題, 應該講出成件事的重點, 甚至概括地講到整件事. 但呢個標題, 好明顯, miss 左至少一半重要資料. 仲要係標題之後, 就接一句隱含相反意思o既俗語, 睇到人頭都大埋.

你擦鞋, 我預o左, 但你落雨又擦, 好天又擦, 貪心得滯, 搞到前言不對後語, 就真係失禮人啦.

呢道新聞甜品, 唔係俾讀者食o既, 而係用來侍奉領導人. 不過俾我係習副主席, 就未必會嗒糖. 當中央領導人o係公開場合, 憑住改革開放三十年大好時機, 大談科學發展觀o既時候, 你班傳媒仲係咁唔科學, 用天氣陰晴穿鑿附會亂拍馬屁, 同古時D 人偽造符瑞, 為當權者增添授命於天o既迷信色彩, 如出一轍. 你班編輯記者當中央領導人之前講話係發up瘋, 定係唔留心聽書, 聽o左都當係耳邊風呢?

薯仔在此奉勸大家食甜品時, 留心一下廚師有無俾大量人工色素染紅o左,  這類食物多吃無益.

品客“薯片”與香港傳媒

星期日, 難得終於可以目訓晏D, 做平日番工日子做唔到但假期一起身洗完面擦完牙就條件反射式地做的動作 － 開電視.

NOW新聞台的一則外電,吸引o左我注意- P & G 唔認品客薯片係薯片! 我由細食到大, 中學時期有時甚至拿來當飯食, 埋頭苦讀應付考試時成筒係咁隊o既Pringles, 只得唔夠一半成份係薯仔！

看著電視機播著各式各樣五色紛陳的Pringles 罐, 我呆o左一呆後, 由腦裡一片空白轉為勃然大怒, 好想對住電視機咆哮: ” 你都呃得我耐o刺“.

怒火稍降, 忽然覺得品客“薯片” 同香港好多傳媒的報導好似, 因為兩件怪物的製造者都搵過我呢D 無知少年笨.

兩種糧食有以下共同點:

1. junk food ： 好多款式味道, 但都係無咩營養,當做零食就ok, 作為主食必會令到身體唔多妥, 思想貧乏.
2. 加鹽加醋 : 好多味精, 但求刺激購買者的感官.
3. 名不符實 ：Pringles的薯仔成分不到五成 有些傳媒聲稱自己公信第一, 銷量第一, 既要做當權者喉舌, 但又要扮持平扮專業, 誤導讀者,觀眾, 廣告商同消費者.
4. 唯利是圖: 為左著數今天的我可以打倒昨天的我 . Pringles 賣過幾多廣告話自己係品客薯片? 全球各地唔同版本的廣告收集番來, 應該幾有趣.為求避稅, P&G就說Pringles 接近餅乾而非薯片，. 香港傳媒的評論, 同一班人可以o係回歸後, 轉晒“馬太”, 把自己以前的立場推翻, 扮失憶.

講到依度, 大家可能會問, 點解薯仔就呢單新聞借題發揮呢？

呢個網誌叫做“薯仔看天下“, 起源係咁:

(1) 薯仔之名, 來自美語Couch Potato, 我o既理解係攤係梳化對住電視機, 唔用腦係咁隊零食入口, 唔消化, 目不轉睛地沉迷煲電視節目的人

(2) 薯仔只係小人物一名,大學時與同學吹水,開始明白天下之大,一己之渺小,連small potato都稱唔上,大家笑言自己係薯粉.依家人大o左少少,叫做薯仔應該都合適掛.

(3) 香港人如果話一個人”薯”, 有好多種意思, 例如蠢蠢地, 鈍鈍地, 唔夠醒目, 唔識潮流地打扮等等, 係某D 時候,以上形容詞描述薯仔都幾貼切.

另外, 有所謂” 秀才不出門, 能知天下事” , 傳媒被認為是幫助我們去認識世界的途徑, 但香港傳媒有操守和能力給受眾帶來這否花花世界的真象嗎? 薯仔力量雖然小, 但還是想好好觀察香港傳媒, 讓大家更接近真相.

選擇網誌今天（2008年7 月6 日) 開張大吉, 因為受到以下事件刺激 :

1. 今天香港記者協會發表了”2008年言論自由年報“
2. 今天報章報導“記協主席冇人做“
3. 今天是未來好大機會係國家出席的習近平先生自出任中央領導人後, 第一天來港的大好子.
4. 陳方安生表明不會參選立法會

是為本網誌序.

延伸閱讀:

(1) 蘋果日報 (2008年7月6日) : 隔 牆 有 耳 ： 記 協 主 席 冇 人 做

(2) 香港記者協會”2008年言論自由年報 ” 新聞稿

(3) Couch Potato ‘ 在維基百科的解釋