呀!運

今日去咗廣州做嘢, 啱啱番到屋企 . 腰酸背痛. 我次次去完購書中心, 都要抬十本八本書番來, 今次亦唔例外.

晨早六點就要起身搭直通車, @_@..還幸, 食在廣州, 每次上廣州食嘅商務午餐, 都無咩邊次唔係食得好嘅,算係補償番啦.

喺廣州試吓上香港電台同蘋果日報網站, 都上到喎.. 大概因為殘奧依然舉行緊, 至於幾時會睇唔到呢? 真係要有心人日日check吓. 兩年後嘅廣州, 仲可唔可以無阻礙睇到港台同蘋果嘅網頁, 薯仔希望不用by luck.

殘奧…香港傳媒都係一味識講金牌選手, 但對殘疾人士嘅權利 – 特別係運動嘅權利 , 有無過深刻嘅討論呢?我唔覺, 如果有請話我知, 唔該. 我以前同一個殘奧選手傾過偈, 雖然係幾年前, 詳情恕我唔喺度講o剌, 但喺我依然記得清楚.運動員嘅堅持, 同佢地家人嘅努力, 我深信殘奧值得支持.

近排大家都將眼光集中喺大陸, 其實喺台北2009年都會舉辦”聽障奧林匹克運動會”, 大家又知唔知呢?

喺廣州車程沿途向車外望, 見到開始宣傳2010亞運, 奧運才剛落幕, 亞運又上場, 真係夠忙..亞運開幕式, 大家不如估下有咩表演, 嘗試度個rundown出來, 到時睇吓自己估中幾多.

我估一定有:

汪阿姐的表演/ 做MC

八和會館連同廣東的名伶

劉德華, 成龍 唱歌

一大班香港歌星唱歌

導演咩人適合做呢? 諗諗先..

最近搭巴士睇咗一套叫”噢!運小將”嘅卡通(唔sure個名, 因為好憎唔想記住)呢d咁取巧嘅名, 真係令薯仔滴汗. 好驚佢到時亞運, 又出部”呀!運xx”… X_X

從 2008北京奧運, 2009香港東亞運, 2009台北聽障運動會,2010廣州亞運, 將兩岸三地嘅人文質素, 藝術修養, 籌辦大型活動能力比較一下, 應該會幾有趣, 希望幾個城市都”好運”.

延伸閱讀:

台北2009年聽障奧林匹克運動會官方網站

http://www.2009deaflympics.org/tw/index.php

廣州2010亞運會官方網站

http://www.gz2010ag.org/

奧運滿漢全席

呢幾日, 薯仔都好忙, 開始早晚顛倒的生活.食宵夜, 好易肥, 但無辦法.

因為私人原因, 開幕式我都未睇. 有外國報章以滿漢全席來形容開幕式 , 唔知呢D 叫做讚美定係明讚暗踩呢?

係薯仔的印象入面, 滿漢全席的製作過程幾殘忍, 聽聞有一道猴子腦, 係把一隻猴子的尾巴夾住在檯中間, 之後就一野扑濕隻馬騮的頭, 趁佢就死未死個陣, 個腦仲係郁郁地function緊, 就拿湯匙“畢”來食, 好得人驚. 把文明同野蠻共冶一爐, 這就是今天的中國. 一面可以係世人面前, 展現奧運各場館的浩大, 但另一邊廂又可以叉香港記者頸, 打日本記者肚..

查維基百科, 睇下滿漢全席實際有咩食.. 一睇..唔多對薯仔口味, 有成過百道菜, 排場大但欠精緻, 同有d評論講, 奧運開幕禮, 只有視覺刺激但欠內蘊精神一樣.

維基百科講,

滿漢全席是中國一種集合滿族和漢族飲食特色的巨型筵席，起源於清朝的宮廷，原為康熙66歲大壽的宴席，旨在化解滿漢不和，後世沿襲此一傳統，加入珍饈，極為奢華。

奧運原是一個旨在促進各民族友誼的運動, 滿漢全席也有民族大融和之意, 但中國今年搞奧運, 卻是一片戾氣, 新疆有恐怖襲擊, 香港又要抬觀眾出場, 呢d就叫做和諧咩?

清朝的康熙帝, 被認為是仁慈的獨裁者, 甚至一代聖君, 在他的統治時期, 還是會大興文字獄; 現代的中國統治者, 是進步咗定係退步? 為咗鞏固政權, 封住人民嘅咀,今日嘅中國同封建時代嘅中國, 有咩分別?  奧運展現嘅中國, 係文明嘅中國定係野蠻嘅中國?

滿漢全席係少數民族統治者度出來嘅菜式, 大自然嘅恩賜加人類智慧整出來嘅食物變成咗PR工具. 猴子腦可能好好味 ..只要你肯狠下心腸, 唔去理解背後殘酷嘅故事,食完之後滿口血紅, 都依然可以自我感覺良好…

延伸閱讀:

新華社: 外媒讚嘆北京奧運開幕式:中華藝術的”滿漢全席”

品客“薯片”與香港傳媒

星期日, 難得終於可以目訓晏D, 做平日番工日子做唔到但假期一起身洗完面擦完牙就條件反射式地做的動作 － 開電視.

NOW新聞台的一則外電,吸引o左我注意- P & G 唔認品客薯片係薯片! 我由細食到大, 中學時期有時甚至拿來當飯食, 埋頭苦讀應付考試時成筒係咁隊o既Pringles, 只得唔夠一半成份係薯仔！

看著電視機播著各式各樣五色紛陳的Pringles 罐, 我呆o左一呆後, 由腦裡一片空白轉為勃然大怒, 好想對住電視機咆哮: ” 你都呃得我耐o刺“.

怒火稍降, 忽然覺得品客“薯片” 同香港好多傳媒的報導好似, 因為兩件怪物的製造者都搵過我呢D 無知少年笨.

兩種糧食有以下共同點:

1. junk food ： 好多款式味道, 但都係無咩營養,當做零食就ok, 作為主食必會令到身體唔多妥, 思想貧乏.
2. 加鹽加醋 : 好多味精, 但求刺激購買者的感官.
3. 名不符實 ：Pringles的薯仔成分不到五成 有些傳媒聲稱自己公信第一, 銷量第一, 既要做當權者喉舌, 但又要扮持平扮專業, 誤導讀者,觀眾, 廣告商同消費者.
4. 唯利是圖: 為左著數今天的我可以打倒昨天的我 . Pringles 賣過幾多廣告話自己係品客薯片? 全球各地唔同版本的廣告收集番來, 應該幾有趣.為求避稅, P&G就說Pringles 接近餅乾而非薯片，. 香港傳媒的評論, 同一班人可以o係回歸後, 轉晒“馬太”, 把自己以前的立場推翻, 扮失憶.

講到依度, 大家可能會問, 點解薯仔就呢單新聞借題發揮呢？

呢個網誌叫做“薯仔看天下“, 起源係咁:

(1) 薯仔之名, 來自美語Couch Potato, 我o既理解係攤係梳化對住電視機, 唔用腦係咁隊零食入口, 唔消化, 目不轉睛地沉迷煲電視節目的人

(2) 薯仔只係小人物一名,大學時與同學吹水,開始明白天下之大,一己之渺小,連small potato都稱唔上,大家笑言自己係薯粉.依家人大o左少少,叫做薯仔應該都合適掛.

(3) 香港人如果話一個人”薯”, 有好多種意思, 例如蠢蠢地, 鈍鈍地, 唔夠醒目, 唔識潮流地打扮等等, 係某D 時候,以上形容詞描述薯仔都幾貼切.

另外, 有所謂” 秀才不出門, 能知天下事” , 傳媒被認為是幫助我們去認識世界的途徑, 但香港傳媒有操守和能力給受眾帶來這否花花世界的真象嗎? 薯仔力量雖然小, 但還是想好好觀察香港傳媒, 讓大家更接近真相.

選擇網誌今天（2008年7 月6 日) 開張大吉, 因為受到以下事件刺激 :

1. 今天香港記者協會發表了”2008年言論自由年報“
2. 今天報章報導“記協主席冇人做“
3. 今天是未來好大機會係國家出席的習近平先生自出任中央領導人後, 第一天來港的大好子.
4. 陳方安生表明不會參選立法會

是為本網誌序.

延伸閱讀:

(1) 蘋果日報 (2008年7月6日) : 隔 牆 有 耳 ： 記 協 主 席 冇 人 做

(2) 香港記者協會”2008年言論自由年報 ” 新聞稿

(3) Couch Potato ‘ 在維基百科的解釋